O venres, 23 de abril de 2021, levouse a cabo unha xornada de voluntariado do proxecto LIFE Fluvial organizada pola Asociación de Desenvolvemento Rural Mariñas-Betanzos.
Os traballos desenvolvidos consistiron na plantación de especies autóctonas de bosque de ribeira nunha parcela titularidade do Concello de Abegondo, na parroquia de Cullergondo, á beira do río Mero.
Dita actuación de divulgación e sensibilización enmarcada en LIFE Fluvial, forma parte dunha serie de actividades programadas durante estes días pola Reserva de Biosfera Mariñas Coruñesas e Terras do Mandeo para a celebración do Día Mundial da Terra 2021.
Nesta ocasión, contouse para elo coa colaboración do Concello de Abegondo, a través do seu departamento de medio ambiente, así como da ONG Cooperación Internacional, entidade galardoada co Premio Estatal ao Voluntariado Social no ano 2017 e que promove o voluntariado medioambiental para concienciar aos mozos e mozas sobre a necesidade de apostar por un desenvolvemento sostible.
Ao longo da xornada, as voluntarias plantaron un total de trinta árbores das especies bidueiro (Betula celtiberica), acivro (Ilex aquifolium) e carballo (Quercus robur), nunha superficie de actuación aproximada de 800 m2. O material vexetal empregado, facilitado pola empresa TRAGSA, pertence ao propio proxecto LIFE Fluvial.
