A Reserva de Biosfera Mariñas Coruñesas e Terras do Mandeo, dentro das axudas a Órganos Xestores, con cargo ao Plan de recuperación, transformación e resiliencia (Unión Europea-NextGenerationEU), desenvolveu, o sábado 29 de abril de 2023, unha xornada de voluntariado ambiental na Praia do Pedrido (dentro da ZEC Betanzos-Mandeo da Rede Natura 2000).
Os traballos, nos que participaron 20 voluntarias e voluntarios, estiveron centrados na retirada da planta invasora Arctotheta calendula, ademais da recollida de lixo e microplásticos do areal.
Dende a Reserva quérese agradecer a implicación do Grupo de cooperación e voluntariado social do Concello de Bergondo, do Centro de Promoción da Autonomía Persoal (CPAP) en Bergondo, así como da empresa Ribeirán Proxectos Naturais, que amosaron unha implicación total coa actividade.
Á finalización da xornada contabilizouse a retirada de arredor de 100 kg de lixo e 400 kg de restos vexetais de Arctotheta calendula, os cales foron debidamente trasladados a xestor autorizado de residuos.
