O actual Programa de Medidas é o instrumento de planificación hidrolóxica que coordina e integra as medidas que se teñen executado, se están a executar e que están programadas dentro da Demarcación Hidrográfica Galicia-Costa no ciclo de planificación 2021-2027. Así mesmo, recolle as previsións de execución de medidas, en anos sucesivos, consideradas necesarias para poder alcanzar os obxectivos ambientais previstos pola Directiva Marco da Auga.
A apertura do período de consulta pública da proposta de Plan Hidrolóxico e de Estudo Ambiental Estratéxico en Galicia-Costa brinda a posibilidade de tentar por en valor o desenvolvemento de proxectos de temática medioambiental, como os promovidos polo Programa LIFE, na contribución á aprendizaxe de técnicas e metodoloxías que axuden na consecución dos obxectivos buscados.
Baixo esta óptica, a Reserva de Biosfera, coa colaboración do Instituto de Biodiversidade Agraria e Desenvolvemento Rural (IBADER), celebrou o 14 de xullo de 2021 un seminario online titulado “Aprendizaxes do proxecto LIFE Fluvial para a súa posible incorporación ao Programa de Medidas do Plan Hidrolóxico Galicia-Costa 2021-2027”, enmarcado dentro das accións do proxecto LIFE FLUVIAL (LIFE16 NAT/ES/000771), do que ámbalas dúas entidades forman parte.
A presentación da xornada correu a cargo de Miguel Fernández, técnico da Reserva de Biosfera, que destacou a importancia das últimas tendencias reflectidas tanto na Lei de Augas de Galicia como na Lei de Cambio Climático e Transición Ecolóxica, nas que cada vez teñen maior protagonismo conceptos como medio ambiente e biodiversidade.
Como relatores, contouse, en primeiro lugar, con Sonia Botana, do Servizo de Planificación e Programación Hidrolóxica de Augas de Galicia (Consellería de Medio Ambiente, Territorio e Vivenda), que realizaou un percorrido polo actual Programa de Medidas do PHGC 2021-2027. A continuación Javier Ferreiro, do IBADER, destacou os traballos levados a cabo no proxecto LIFE Fluvial como elementos enriquecedores e con potencialidade de aprendizaxe para a súa posible incorporación ao citado Programa de Medidas. Por último, dende a Confederación Hidrográfica do Douro, da man de Carlos Marcos, se tivo ocasión de coñecer as experiencias adquiridas polo proxecto LIFE IP-RBMP Duero no seu Plan Hidrolóxico.
O seminario contou con 34 persoas inscritas con vinculacións profesionais ao Medio Ambiente, dende Universidades, Administracións locais e autonómicas, empresas públicas e privadas, Centros de formación ou Entidades Medioambientais.