XORNADA DE VOLUNTARIADO SOBRE ELIMINACIÓN DE ESPECIES EXÓTICAS INVASORAS NO MONTE DAS MOAS EN IRIXOA (A CORUÑA)

O domingo 5 de xuño de 2022, como actividade enmarcada na celebración do Día Mundial do Medio Ambiente, a Asociación de Desenvolvemento Rural Mariñas-Betanzos levou a cabo unha xornada de voluntariado ambiental dentro do proxecto LIFE FLUVIAL, coa colaboración da Asociación Nacional GN Medio Ambiente. A xornada tivo lugar no Monte Veciñal en Man Común Monte das Moas, na parroquia de Mántaras (Irixoa), contando coa implicación dos socios propietarios dos terreos.

No ano 2019, a Comunidade de Montes en Man Común de San Antón, co apoio das axudas Leader, transformou unha superficie de 3,8 hectáreas, ocupadas anteriormente na súa práctica totalidade por eucalipto, coa plantación de especies frondosas como carballo, bidueiro, sobreira, castiñeiro, nogueira e cerdeira. Esta transformación constitúe un exemplo demostrativo das aptitudes produtivas do monte realizadas dun xeito sostible, en contraposición á cotiá implantación de especies forestais exóticas de crecemento rápido.

A xornada, continuidade doutra de similares características desenvolvida no mesmo lugar en xuño de 2021, tivo como obxectivo o control de rebrotes de eucalipto de semente, recorrentes en áreas nas que a presenza de dita especie resulta habitual. Ao mesmo tempo, os voluntarios contribuíron á recollida de refugallos nas inmediacións.

As actividades iniciáronse cunha breve introdución sobre a Reserva de Biosfera Mariñas Coruñesas e Terras do Mandeo e o proxecto LIFE Fluvial. A continuación, baixo a supervisión de monitores especializados e coas indicacións dos veciños da zona, un nutrido grupo duns 35 voluntarios foi distribuído pola superficie de actuación para acometer os traballos programados.

Á finalización da xornada, e trala complicada localización dos gromos de eucalipto entre a vexetación, contabilizouse o arrinque de arredor de 150 dos mesmos.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies