LIFE FLUVIAL organiza unha xornada de voluntariado ambiental na ZEC Encoro de Abegondo-Cecebre (A Coruña)

LIFE FLUVIAL organiza unha xornada de voluntariado ambiental na ZEC Encoro de Abegondo-Cecebre (A Coruña)

O sábado 29 de febreiro, o proxecto LIFE FLUVIAL (LIFE16 NAT/ES/000771) organizou unha xornada de voluntariado ambiental en colaboración co proxecto LIFE Evergreen with volunteer, LIFE LEWO (LIFE16 ESC/ES/001), coordinado dende a Dirección Xeral de Xuventude, Participación e Voluntariado (DXXPV) da Consellería de Política Social da Xunta de Galicia, en colaboración coa Dirección Xeral de Patrimonio Natural (DXPN) da Consellería de Medio Ambiente, Territorio e Vivenda.

Para o desenvolvemento das actuacións contouse coa dirección técnica do Instituto de Biodiversidade Agraria e Desenvolvemento Rural (IBADER) da Universidade de Santiago de Compostela e co apoio de persoal técnico de EMALCSA e da Asociación de Desenvolvemento Rural Mariñas-Betanzos como órgano xestor da Reserva de Biosfera Mariñas Coruñesas e Terras do Mandeo.

 

O enclave escollido para os traballos foi a ZEC Encoro de Abegondo-Cecebre (ES1110004), concretamente en dúas áreas das parroquias de Crendes (concello de Abegondo) e Bribes (concello de Cambre), pertencentes ámbalas dúas a terreos públicos propiedade do Concello de A Coruña e xestionados pola empresa pública EMALCSA.

A nivel institucional, a xornada contou coa presenza da xefa territorial da Consellería de Política Social en A Coruña, da directora xeral de Xuventude, Participación e Voluntariado da Consellería de Política Social ou a concelleira de Formación, Emprego, Educación, Turismo e Seguriadade Cidadá do Concello de Abegondo.

Ao inicio da xornada, dende o IBADER ofreceuse unha breve charla explicativa sobre o LIFE FLUVIAL, a ZEC Encoro de Abegondo-Cecebre así como dos perigos que representan as especies exóticas invasoras especialmente nestes espazos de elevado valor medioambiental.

A continuación iniciáronse os labores de control de Conyza canadensis, especie de sinxelo arrinque manual de raíz, nos emprazamentos seleccionados. Nunha primeira fase, acometeuse o control nas inmediacións do observatorio de aves de Crendes, traballándose nunha superficie total de arredor de 1.000 m2.

Con posterioridade, voluntarios e técnicos desprazáronse á parroquia de Bribes (concello de Cambre) para continuar cos traballos de control da mesma especie invasora. Neste caso, por mor da climatoloxía e do horario dispoñible, soamente se puido execer o labor de control nuns 450 m2, arredor do 20% da superficie afectada por Conyza canadensis.

A xornada finalizou cunha explicación por parte de EMALCSA sobre o encoro de Abegondo-Cecebre e o papel que representa a preservación do medio ambiente na calidade da auga de consumo destinada á cidade da Coruña e parte da súa área metropolitana.

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies